الدنيا دي زي اتوبييس و احنا فيه زي الركاب..
اللي قاعد تحت الكرسي واللي قاعد في السحاب..
اللي قاطع تذكرته فعلا و اللي مزوغ من الحساب..
و كله نازل في المحطة مهما يبعد عن الباب..
عجبي
لا نقدر نمحي و لا نزود ..
و عل الرضى لازم نتعود ..
و ياريت يا صاحبي في زر ديليت..
نيجي عل الغلطة و نحود..
ياريت
سخنت قلبي على نار السبرتاية..
و قلت اشرب ميته ..و اربي سهراية..
طلع طعمه مسكر معسل و تحفة ..
اكمنك فيه و طعمك حكاية..
عجبي
آل ما بياخدش لعيبة غير الملتزمين..
واحد هربان من الضرايب..وواحد سيرته طين..
و واحد بلنتياته نصبه..وواحد رقاص متين..
هي دي مصر يا عبله..عاقلينها مجانين..
عجبي
اتحررت بيك الدنيا ..و الفكر من السجان ،
و فيك الانسانية .. عرفت الانسان ،
ورتنا العقل باب.. بيودي عل الايمان
،لو الاسلام كتاب..عليه انت العنوان
،سيدي يا رسول الله
No comments:
Post a Comment