خد براءة من الحرامية امال هم يعني كانوا حيجازوك؟؟
داهية تاخد روحهم و روحك و بالمرة جميع اللي بيساندوك..
تقتل اعزلنا و تعذب بريئنا و فاكر حتفلت بخيبة ابوك..
يا عبد الحكومة و عبد الباشا، مش هم يا خيبة اللي حيحاسبوك!
نا وانت قمر بيلف حوالين ارضه و عليه من الخوف ,,
القمر نوره شمس حبنا وده حب سطح و جوف ،،
انا وانت سؤال بيلف في القلب و الروح و يطوف ,,
يا تري يجمعنا يوم قدر و لا نصيبنا خسوف ...
عجبي
مالك يا بلاد خدوها منا الباشا و البيه؟؟
رجمتي عقلك و عدلك و لبستي الاسود ليه؟؟
غطيتي وش الفرحة و كفنوكي يا فالحة ،
لا و المصيبة اهلك فرحانين باللي انتي فيه؟؟
حرابة و خرابة و ضباع ويا الديابة،
و دين قايم بيصرخ مللي عملوه فيه ..
مالك يا بلد الخشوع؟؟
بقيتي بحار دموع..
يبكي عليكي محمد و يبكي عليكي يسوع..
لا محبة بعد خوف و لا شبع من بعد جوع..
بعتي عقلك وفكرك و جالك غبي جربوع ..
امشي وراهم في سكة ما فيها ليكي رجوع..
امشى وراهم كفاني دموع بتولد دموع
No comments:
Post a Comment