كان فيه واحد بيحب واحدة .. و من غيرها ما يقدرش يعيش..
اهله بحدة وبكلمة واحدة .. قالوا حبها.. بس الكلام ده مافيش ..
الواد انحسر ..و وشه انكسر ..و الحزن حط في قلبه جيش..
و هنا سؤال ،بالدم والمال ...
ازاي الاهل يموتوا العيال ؟؟
و عايزينها تعيش؟؟؟؟
عجبي
شكاير في جفني.. شدتني ..لفوق.. فوق مستوى الواقع..
والبشاير في حلمي..جابتني..ودتني ..لاحلام و روائع..
اصل الحقيقة و في الواقع..
الصحيان مش جايب همه.. وواقع
و حاير يابني بين الاتنين..
...حلم دافي و ملاوع..
و الواقع الساقع..
عجبي
تنكسر بصوت كل الحاجات ..بس قلبي انكسر من سكات..
و فيه حاجات كتير بتتصلح ..و ما بتتصلحشي كتير حاجات..
لميت الحتت المبعترة ..و سبتها في عيوني تبات ..
عشان انت في كل حتة منها .. و انت ..اغلى الحاجات..
عجبي
سكاكين الوقت بتعدي و تقطع في الاعصاب..
و اللي بيجيب و يودي في الآخر كله سراب؟؟؟
خير و لا شر .. بحر و لا بر.. دوا و لا عذاب؟؟؟
اللي خاف انضر ..و اللي ما خاف انضر ،
كله نتيجة واحدة ..و ان اختلفت الاسباب...
...
سكندرية في عز الخريف و لسعة البرد الحلوة بالليل ...
و حجر الشيشة احمر لطيف بيغمز في نن عين الجميل ..
و الكافيه عيشة و تخاريف و همز و لمز في عز الحب و المواويل ..
و العمر بيفوت خفيف ريشة و ازاي الميزان في الآخر حيبقى تقيل؟؟؟؟؟
عجبي
لما اقولك تعالي ما تردش بلأ..
لما قلت لالالا..قلبي لق في الدقة..
مرة حيلق في الدقة ..و مش حينفع فيه زقة.. و ذنبه في رقبتك ..يا قاتلني برسالة ...و بمنتهى الرقة ..
عجبي
يا نجمة في السما نبراس ..و ياما غنولها كتير ناس..
ازاي من فوق نزلتي
و و ايه اساس الاحساس؟؟؟
انتي جيتي و في بيتي ..
و لا ده كاس بلا كاس؟؟؟
... يا نجمة ..وحياة نورك ردي عليا..
دانا وحياة نور عنيا ..
محتاس..
عجبي...
ديتك و ادتني و جبتك و ودتني و بنيتك و هدتني و الخسران انا..
و الفكرة العكرة ان امبارح و بكره في ايدك يا ناكره من غير اعتنا...
يا كامل في غدرك يا طايح في هجرك يا رايح لقبرك و معاك حبنا..
يا غلبي في صلحك و غلبي في جرحك و غلبي في بعدك و غلبي هنا...
عجبي..
شايل الشكارة عشان عياله ..
فيها حمولته,,
و فيها حمول الحياة..
معاه السجارة و طالع السقالة ..
و تكاله كله على الله..
...لا همه عمره ولا سلامته....
و خليها عللى خلقك...
ما تقولش آه ..
..لو وقع قدر ..
و لو سلم قدر ..
هي دي حكمته...
اكبر كتير ..
من مستواه ....
عجبي
No comments:
Post a Comment