شمسية

شمسيه بيضا مِطَاطيه ..
علي بحرنا بتوشوشه..
ع اللي شافته و اللي سمعته..
و اللي تكِّسف تكشفه..
تحتي ياما قالوا و ياما لتوا..
و سبِلوا و بربشوا..
ياما شفت حكاوي حلوه..
و برضه حكاوي يطرشوا..
البحر رفع موجه لها..
و علي قصتها..
رمي رغوته..
قالها شايفه الزَبَد ده..
اهه ده البني آدم و قصته..
اسأليني انا عن ناره..
و انا برضه عن جنته..
و اللي انتشوا..
في حضني انا..
ياما كانوا بيتجرؤا..
ياما كانوا بيختشوا..
بس الاكاده يا زهره بيضا..
عاشوا كل حي ف عشِّته
و انا زيك انتي..
بانتشي..
زي ما هم.. بينتشوا!!