الاولة 1

الاولة: يا بخت من ليل عليه الليل وهو في حضن احبابه...
و الثانية:يا بخت ميل و حيي الجميل اللي ييحن لاصحابه...
و التالتة: يا تخت المواويل قول للقلبه عليل : عقاب الندل اجتنابه..
عجبي

و بعدين

< و بعدين بقى في الدايرة دي ..
و في المراكب اللي مش سايرة دي ..
و الهموم الكتيرة الحايرة دي؟
و الكل كليلة ان جيت للحق؟؟؟


و بعدين في الساعات المعدية ..
و الارواح المصدية ..
و العقول السوداوية ..
في البلاد الردية ؟
و العليلة و الكل مصدق؟؟؟


وبعدين في الكلام المكرر ..
و الملام الممرر ..
و اللسان المتشمر ..
عشان يسب و يتقمر ؟
و كل اللي راح و اللي انحرق؟؟؟


و بعدين في بكرة وامبارح..
و العلقم اللي طارح ..
و البكا في كل المطارح ..
يا بلاد الغاية هي الوسيلة؟؟؟
يا بلاد ما بتجمع ..بتفرق!!!

عجبي

النتيجة

خلعت قلبي من جوفي و صدري..

و طلعت منه خوفي و صبري..

و جمعت من جوفي حلاوتك و مري..

و علقته على برج بعيد و عالي

...

و بمشرط صغير ..

و بدقة تحير ..

قدرت اتغير ..و

شلت منه كل الصور..

و ريحة السجاير و الشاي والسهر ..

و سبته يهج سعيد و خالي

...

و بعد شوية قرون..

وا نا عايشة اساسا بدون..

اي لازمة او اي لزوم..

قابلني صدفة قلبي المأزوم..

و نادالي و نزل و جالي

..

هو آه صدى من الهوا..

و من جواه فضى كل الهوي..

لكن عرف يجيب من الهوا..

كل حكايتنا سوا..

و لقيتك جواه بتلالي....

عجبي.. ..

22-12

ن اوراق ستي المتضايقة بقى:
لا اسمعك تحكي يا عيل.. و لا كتير محتاج تلك..
ايه رجعك يا منيل.. تشات على الفيسبوك؟؟؟
الحية شوية تكرمهما و تلدغك ..و ده طبعها..
و انت نفسك شوية تحترمها .. و ترجع تعك ..
...عجبي

من اوراق سيدي المتضايق:
ياخونا وانت جنبي حأشوف انا مين؟؟
كرهتونا في صنف البني ادمين...
ياما نفسي ابني جدار من نار...
و اهده عليكم يا معفنين...
... عجبي


What is all this silence??
Its what remains when all has been said, all the players are long dead, there is no one there, all the skins are shed, it should be ok but its sooo cold instead.
It looks like a serpents mold , but im sure it is my bed.
An illusion is bold and it can look like gold and if truth be told it can bite off y...our head,it bit off my head.Oh how much it bleeds and Oh how much it bled!!!


اذكر احاديث الصباح و المساء ..
تعبر محاريث في تربة السماء ..
تغيث احدنا بالسعادة أو الشقاء ..
غوث و غيث ..
كانت او ما كانت ما نشاء ..
...عجبي

الكحة

لما الواحد بيمرض ..
و المرض في عينيه بيقرض .,.
و يقعد يخمن و يفرض ..

في اللي جاله و الاحتمالات..
و لما الكحة تشيل و تحط ..
و تحاول تبطها مابتنبط ..
و الحر ينط في صدرك نط ..
و تمر الساعات..


تفتكر لما كنت امبارح سليم ..
من شوية مش في التاريخ القديم ..
و تحمد ربنا الحي الكريم ..
ان المرض بس
من العمر ساعات..


تسمع منير و تشرب ليمون ..
و تنام كتير... و تهرب من الكون ..
و لما المصير و العيال ينادون ..
تطنش
و تنام تحت اللحافات..
عجبي

الامل المريع

ايها الصامت كما الحجر ..الثابت كما الضجر ..الباهت بلا صور ..يا تمثال الصقيع..
ايها الصامد و انت كسير ..و جامد و انت حرير ..و نابض بلا شعور ..يا ايها السم النقيع ..
ايها الشامل بلا حدود ..و مجامل لاقصى حدود ..و خامل كما البرود ..يا ايها الحلم الصريع..
ايها النصيب العصيب ..و الصعيب الغريب ..و المريب العجيب .. يا ايها الامل المريع ..
عجبا...

كلنا محتاج

لو كان الموت بالمزاج ..ما كانش يعيش محتاج..الدنيا مليانة آهات .. و ماعندنا ليها علاج...
الولد بيوجع والده ....و اللي بيديك شئ بياخده..و الله كريم لوحده..و هو لوحده السراج..
الآه مغرقة الدنيا..و انا عايزة دنيا تانية.. الآه فيها فانية.. و الوقت ماهوش كرباج...
يا رب يا جابر الخواطر..ساوي لخلقك دفاتر.. و استر علينا يا ساتر.. ده كلنا م...حتاج ...
عجبي

نوة

بيقولوا بكرة نوة ..يبقى احنا نكن جوه ..و لو خارج اتروى ..و غير خططك اوام...
في مصر المطر خطر ..و في الشارع تتعتر ..و تغرق في الحفر .. و تعوم جنب الترام..
شوية مية خفاف ..يخلوا البلد تخاف ..و الناس تحت اللحاف ..مرضوا و عم الزكام..
الزم بيتك بالذوق ..و الشغل وغيره ملحوق ..و بكره الجو يروق .. و كله بيقى تمام ..
عجبي

قال محمد عبد السلام: قوم اذا صفعت بالنعال وجوههم شكت النعال بأى ذنب تصفع .
فقلت انا :
قوم اذا بلعتهم البلاليع
شكت البلاليع بأي ذنب تبلع؟؟؟
قوم اذا احتوتهم النفايات
شكت بأي ذنب معهم تجمع؟؟؟
قوم هم البشاعة بعينها
بل و الله هم من البشاعة ابشع!!!!!

الخميس

الخميس رجع يتعكز ..
بوجع صافي مركز..
كأنه عمال يتجهز..
بقية الاسبوع...

اصله يوم الاجازة ..
و المفروض عندي له عازة ..
امال انا باترازى ..
ليه بقى بالموضوع؟؟؟

راح منا ما نستني..
و طار منا ما نتمنى ..
وبرضانا او غصب عنا ..
الواحد تنه موجوع ..

و علمتني دروس الدنيا
حكمة العيشة الفانية:
تديك مناك لثانية ..
و على قفاك اسبوع ...
عجبي

شحات

شحات و داير في البلاد شحات..
و اكتشفت ان السن و الدروشة اخوات..
و الهم مع العمر بيبقى بالات بالات..
حد يشيل معايا .. انتوا ما عندكوش اخوات؟؟؟

نجمة بحر

صباح نجمة بحر حمراء ..جمرة بتبرق على شط حلم مالوش مكان...
و سمكة فضية .. جنبها بتلعب قلبها بيضرب دقته الحان....
و حصان اسود.. بغرة بتشهد ان اللون الابيض مهما صغر بيبان..
و مراكب تحارب.. رغم موج التجارب و ترسى القوارب على شط الامان...
عجبي

برك

ليه اقرب ما ليك بيطعنك
و بحبه ليك بيلعنك
و صبحه ليله يقطمك
و هو بقلبه و روحه معك؟؟
ليه الكلام يبقى سيوف
و كله ملام معجون بخوف
و ليه في عين حبك تشوف
كل ده العك؟؟؟؟
ليه يا ورد كلك شوك
و ليه يا فرح مغزول بشوك
و ليه نمشي عليك يا شوك
و ليه نتشك؟؟
حد عنده اجابة يا ناس
من بره او جوه الكلاس
من كتاب او من كراس
لحسن قلبي خلاص..
برك...
عجبي

alex drowning

احت السكرة و جت الفكرة و نزلت عبرة غرقت مدن..
ليه الشتا نازل عطا و هو الشتا بكا الزمن؟؟؟
معقولة الزمن كان له شجن و حب و اتركن و قلبه حزن؟؟؟
طب الانسان و مالوش امان خاين \زهقان ..لكن كمان الحب الجبان قادر يبكي حتى الزمن؟؟؟
عجبي


رد..لا مش برد..ده وقت الحصر والجرد..اللي مش عاجبه الحر..يجي دلوقتي يرد..ماله الحر و الصهد..حلو الجو اللي يخض؟؟ غاب الشتا و غاب و جه بأقصى رد..عجبي



its sad ,my lad when love goes bad.
We try and cry and say goodbye,
We bloom in gloom and talk of doom,
We deal the blows and step on toes and so it goes in every case,
and in the end,we sway and bend and try to mend the broken vase.
Some times it sticks , soemtimes it clicks, but its still a fix , not a base.
Sometimes sorry is the hardest word anybody and everybody sais

الاصول

مش حأكرر و لا ابرر و لا حتأسف و لا حتهور...
كل حي يختار طريقه و اللي معانا يؤمر و ينور..
و اللي يعبر اللي ما يتعبر ..يبقى حمار لو لابس شنبر..
بس الاصول نقعد ونقول ..و كل حي عن نفسه يعبر..
عجبي

ستانلي\ 5 ديسمبر

الشتا في الجو في ستانلي ..
و الناس على الكوبري بتتصور...
و الحجر هو هو مشتاقلي ..
و النفوس بس بتتغير..
و باينه كان متهيألي..
بس اللي يقلق و يحير..
الحلم ده كان كبير و صغر ؟؟
و لا اصلا كان كده صغير...
عجبي

7th of December 2010

عندي البنزين و ما جابوليش الفرامل..
ادوس و احوس و تدميري شامل..
لحد ما المركب تخش في الحيط..
و لا استناش تخش في عاجل او آجل...
عجبي



خلصت كل الكلام و جه وقت السكوت..
و كل شئ في الدنيا بيجي له زمان يفوت..
تحاول تداول و على نفسك تفوت..
الحاجة الحية بتوجع و الراحة لما تموت..
عجبي

تنكسر

تنكسر بصوت كل الحاجات ..
بس قلبي انكسر من سكات..
و فيه حاجات كتير بتتصلح ..
و ما بتتصلحشي كتير حاجات..
لميت الحتت المبعترة ..
و سبتها في عيوني تبات ..
عشان انت في كل حتة منها ..
و انت ..
اغلى الحاجات..
عجبي

كان فيه

كان فيه واحد بيحب واحدة .. و من غيرها ما يقدرش يعيش..
اهله بحدة وبكلمة واحدة .. قالوا حبها بس الكلام ده مافيش ..
الواد انحسر ..و وشه انكسر ..و الحزن حط في قلبه جيش..
و هنا سؤال ،بالدم والمال ...
ازاي الاهل يموتوا العيال ؟؟
...و عايزينها تعيش؟؟؟؟
عجبي


شكاير في جفني.. شدتني ..لفوق.. فوق مستوى الواقع..
والبشاير في حلمي..جابتني..ودتني ..لاحلام و روائع..
اصل الحقيقة و في الواقع..
الصحيان مش جايب همه.. وواقع
و حاير يابني بين الاتنين..
...حلم دافي و ملاوع..
و الواقع الساقع..
عجبي

مش كل

مش كل صاحب يتقاله سرك و لا كل من ركب الحصان خيال...
و مش كل راكب تفتح له بحرك و لا كل من غنى موال متقال...
و لا كل طالب تشرح له درسك و لا كل من قالك بحبك خال..
و ان كنت راغب تعرف ده من ده..فللاسف .ما في اجابة لده السؤال...
عجبي