الكرة لسة في الملعب!!

اللي فاكر الماتش خلاص ..
و الجمهور مروحين,,
و الفريق الابيض بلاص ,,
و المنصر كسبانين,,
عاوزاكوا تفتكروا حاجة,,
نعرفها من سنين ,,
بعد ما طلع مطرود ,,
لاعيب الخوانين,,
ياما ماتشات كتيرة ,,
خلصت في الدقيقة تسعين!!

يوماتي

يوماتي اصحى بتكشيرة ,,
و نظراتي مليانة بالحيرة,,
بلادي خطفها الحرامية..
 ببيادة و بالدقن العيرة..

 يوماتي انام كاتمة الدمعة,,
 و الناس الطارشة و لو سامعة,,
 بيطفوا قدامي الشمعة،،
 و ديابة بلادي انا كتيرة،،

 يوماتي احلم ببلاوي،،
 و جزمة على موتي انا ناوي،،
 و دقن تكدب بفتاوي,,
 و تموت احلامي و هي صغيرة,,
 و تصغر مصر و هي كبيرة..
و هي كبيرة

مخالب

يا عسكري يا محتل بيتي و فرشتي.. يا قابض بمخالب نسرك علي قوتي و كلمتي.. خد كل حاجة من عيني.. حاموت بفرحتي، و حتموت بفكرتي!! قالوا لاخوانجي عاوزين عهد.. قال انا من مهد للحد.. ايماني بس لجماعتي.. و لا اعرف مصر و لا اعرف حد

مصاب الثورة

مكسوف الواحد من اللي اتصاب.. و نايم على سرير مفروش بنار الذل.. حقه و رفعة راسه سرقها النصاب.. و دفع كتير الامير تمن كرامة الكل.. الشهيد عند ربه عزيز ومهاب.. مرتاح ووجهه زي بدر يطل.. و مصابين مصر مقفول عليهم باب.. مكان شفا يخلي السليم يتعل.. يا مصاب ثورتنا حقك عل الاحباب.. لساهم حبايبي في ميدان الفل.. بيدوروا على حقك و حق اللي عنا غاب.. و حترفع راسك، بس الغيلان دي عنا تحل... يا مصاب..