اواخر سنة و بدايات اخرى

يا عم هات اللي عندك لينا و خد باقي حسابك ,,, يا عم لا يمطرك سحاب ليالينا و لا يضلنا سحابك ,, يا عم لا تدق على شبابيكنا و لا ندق على بابك ,, يا عم عندنا اللي شابكنا,,شوف انت بقى اصحابك . !!!! ----------------------------------------------------------------------------------------------------------------------------------------- العقل زينة الإنسان و تاج راسه,, واللي ما يحترمه يحتاج علاج راسه,, ينذل ينهان و تيجي في التراب راسه,, الدنيا كتاب الحق و العلم ده اساسه.!!! ------------------------------------------------------------------------------------------------------------------------------- دقن و صوت و مناظر.. هو ده يا مرسي تمامك.. آخرتها بتحكم فينا,, باللي بيحكمه حكامك.!!! ------------------------------------------------------------------------------------------------------------------------------- ما بين الملل و الرجا,, حايرة طيور الروح,, خلصت فيكي الرجا,, والملل مسك في الروح,, يا مصر كفاية بقى,, طلعت من عينينا الروح,, يا مصر اختاري الشقا,, او اللي فيه الروح,, اختاري بقى تعبنا,, حتى التعب مجروح.,,,,,,,, --------------------------------------------------------------------------------------------------------------------------------- مفكر متعكر الدم من التفكير,,, و مثقف اي مقطف اسعد منه كتير كتير ,, و فنان حر و جنان اي جاهل شايفه فقير,, العقل نعمة بس يزعل .. و الجهل راحة و لو نقمة.. و الجاهل اعمي و لو اجمل.. و العارف شايف و لو اعمى.. --------------------------------------------------------------------------------------------------------------------------------- عشنا ما عشنا بنشكر على عشنا,, رضا بقضا العادل عن السؤال يحوشنا,, المصري راضي راضي ,,يركب الظابط والقاضي ,, مهما يسرق في عيشنا او بالكرباج يلوشنا,, انما تبيعوا الاراضي,, للشيوخ و الاعادي,, و تحكموا على ولادي,, بالمرمطة في بلادي,, تبيعوا مستقبلهم و تحاصروا كل آمالهم,, لا اسمحلي يا خاين,, انا بده مش راضي,, اخدتوا كل حاجة,, ليكم بقيت انا فاضي,, فاضي ليكم يا خونه،، و حتدوني بلادي،، حتدوني بلادي.،، ------------------------------------------------------------------------------------------------------------------------------ دمنا سال في الشوارع و البيوت و الكنايس... و الغريب اللي بيزود ف ظلمه و دايس... شباب و بنات.. في التربه تبات.. و شيوخ بلا دين.. و حكام مجرمين.. عجايز عجايز.. في بلادي عايشين.... و متبتين... و الموت له العرايس... ليه يا وطني الحزين؟؟. ----------------------------------------------------------------------------------------------------------------------------- بيدعي عالعيال .. و لابس الشوال.. و رابط العقال.. اللي ماسكه الخليج... عقله تحت الحزام.. و مخه مليان سخام.. قلبه غرقان حرام .. و علي الاطفال يهيج.. اصلا ماهوش انسان... اصلا مالوش اديان.. في كل مله اصله ..ده نوع من الضجيج.!! ----------------------------------------------------------------------------------------------------------------------------- لما حاربت الجهل و قابلته بسيف عقلي,, شفت ان هو سهل و الصعب اني اصون عقلي,, لما تشوف الوحش ناصب علينا جيشه,, يا صاحبي سيبلي الوحش ، بس انت احرسلي عقلي!!! . ---------------------------------------------------------------------------------------------------------------------------------------