لو الحمار سمع نفسه كان انتحر من الهم..
و برضه الحمار احسن من عديم الدم..
يقتل القتيل و يقو و لا نهتم..
صنف جلف اخره يقول نعم
الشهيد متبسم كأن النبي زاره..
و الجبان متكوم كأن الذل ده داره..
الشهيد بيسلم على اللي قلبه معاه..
و نصير الكدابين كفاية عليه ناره!
يا مصر خانت و باعت عساكر الجهل والشوم
، نهارنا اسود ونهار الندل منور و باين
، لو مش مصدق روح على المشرحة عاين
ولادنا متلقحين على الخشب بالكوم
جدع يا باشا قلعتني، بايديك الوسخة لمستني..
يا ترى حتترقى و تاخد نشان و لا كان مفروض قتلتني؟
يا نجس يا ابو عصاية مديهالك اسيادك الانجاس ,،،
يا شاري سلاحك من عرق و كد العيال و الناس ..
اضرب و خرب و اسحل و جرب ،،
متعة ضرب المصري سيدك و سيد الناس..
ما يعليش الواطي ضرب سيده
و لا يقلل من السيد لما يضربون انجاس....
و رغم الغولة والتمساح ،
و بايع بيته و المفتاح ،
لسه صباحنا نادي و ابيض،
و المجرمين مالهم صباح !
عجبي
فاعد التعلب خنيس تحت العشة ,,
مستني الاسد يكش الكشة ,,
طلع الاسد هش الناس العفشة,,
والتعلب جرى و خطف البلد في هبشة ،،
اخوان كانوا و لا سلف,,
كله كدب و كله قرف ,,
لكن الاسد لساه ما ماتش ,,
و اللي في المقدر بكره يتعرف !
تاني بينفض حبيبنا الميدان
و يموت الجدع و يعيش الجبان
و الشعب غرقان في انتخابات نزيهة
و خالته نزيهة مع ابن الجيران ،
يا شهيد انت اللي ارتحت
و وجعتلنا ارواحنا فحت
و احنا على السكة
على الاقل بالنية
و دي ما تتشرحش مهما شرحت
, اسفين يا شباب!
قالك تسعين في المية ،
طبعا مانت بخمسين..
مخك اوضة مهوية..
و فاكر شعبك مجانين،،
يا شاهين الغبرة استني ،،،
جايلك يومك يا شاهين!!!
عيون اخواتي خزأتها
و قلوب اخواتها خلعتها
و عيال كتير يتمتها ..
ركبت اسرائيل على ستها
و سرقت حياتنا و بعتها
و لشيخ الخليج اجرتها
ما شبعتش لسه يا عسكري؟؟؟
في الموت و القتل فنجري؟؟
اتفاقيات سلام مع
العدو لكن مع شعبك تفتري؟؟
زهقنا خلاص يا حكامنا
يا سرطانا يا تاريخ حزين
خدنا و جري..
شبابنا جايلك يشتري
منك حياتنا بعمره البري ...
سيبه يشتري
سيبه يشتري
بدل ما تدلل على الاقصى
يا خاين اهلك بالخسة
يا بايع سمكك للبسة
يا بو دقن نفاق..
حرر بلدك الاول
مش على عمرها تدلل
عشان تبقى في الاول
و بدون اخلاق
قالك هدنة ،
الشلة النتنة ،
بتوع الفتنة ،
السفاحين..
ببدلة رسمي،
بيخرم جسمي،
و يمحي اسمي
من العايشين..
انت بلطجي،
و كبيرك كفتجي ،
و انتوا عصابة واحدة
مش اتنين..
و احنا الشهدا عليكوا
يا بعدا
حموتوا كفرة
يا تعيشوا مساجين..
انتهى
تاني تاني تاني
العسكر مش فاهمة تاني..
النار و البارود
و الغدر اللي عماني ...
تاني تاني تاني ؟؟
الغبا و البطء تاني ..
و حتقتلونا بكره يمكن ..
بس اخرتكم ثواني .
.تاني
يا بايع اهلك و ناسك
و قاعد مع العسكر..
عامل زي اللي جوه المسجد
و مزاجه كده يسكر..
روح بهبلك
بيع ببلاش اهلك..
و لا تتكلم
و لا تنفي
و لا تنكر
يا مصر بصى بعينيكي
اللي فقعهم حرسك..
بصي على الميدان
فيه صوت ادانك و جرسك..
يا مصر الميدان جالك
اللي اشترى خاطرك و باع عمره ..
اشتريه بقى و بيعي
اللي من زمان حابسك ...
يا مصر
في عز الصعب لم فتكم في السهل فتوني,,
يا مصري دانا حركم ليه تسبوني,,
اموت و انزف
كله لكم و اضحي بعيوني..
يروح جسمي يزول اسمي
بس ابقوا ادفنوني!!
يا مجلس الهنا افرح يا عمنا..
الواد ده اتقتل و الواد ده اتعمى..
و البت دي اتعرت و البت دي اتذلت ..
و الدقون حبايبك معاك في المحزنة..
يا مجلس بكره الحساب في محاكمة معلنة !
مطر حبات من نور و جوهر ،
و اصغر ثانية في بحورك و اكبر،
يا اسكندرية يا موطن المحبة،
ها انا صبرت و سوف اصبر اكثر
امي يا زينة الدنيا و خلاصة بهجتها..
يا من تظلم الدنيا ان توارت ضحكتها..
امي يا ملاكا مصنوعا لي وحدي انا فقط..
امي انتي مظلة لروحي و حبك حمايتها..
عشتي امي
يا قاعد فوق في قصرك متهني بالضيافة..
و منافقينك تحاصرك بالكذب والسخافة ..
و كل الناس في مصرك مقتولة باللفافة..
تصبح و شعبك عاصرك غريق من التفافة
البيه اللي عامل ريس مشغول قوي بالمايوه..
هم المصريين يا حيلتها بقوا البحر يروحوه؟؟
الغلب اكل ولادهم و مش لاقيين هدومهم،
بدل ما تفكر في القلع :هو فين ما يلبسوه!!!!!
هبل والله
يا رافعا العلم داهية تاخد هبلك..
تحبس الورد و تزرع علم في حقلك..
خربت البلد و عريت ناسك و اهلك..
انتصرت علينا ببرجك و جرستنا بجهلك..
يخي يلعن ابو شكلك
يا مصر جيتي تقومي كسروكي و ملوكي شروخ ..
يا مصر ولادك غلابة يا مدهوس يا منفوخ..
يا مصر كل مدى الحب فيكي بيبوخ..
عاجبينك المسوخ ؟؟اللي باعوكي و الشيوخ؟؟..
الل بيرضى بالذل و بياكل البطروخ؟؟؟
و الراجل المطيع.. في تعذيبنا صاروخ.؟؟
و الظالم الشنيع.. و الحق اللي ملبوخ؟؟؟
و الكذب في كل وش و الحكم اللي مطبوخ؟؟؟
و اللي ميت بالجزمة واللي ميت مطخوخ؟؟؟
عاجبك يا مصر حالك؟؟؟؟
عشان انا خلاص مليت..
مليت العرر في قصورك
و الشعب في التوابيت..
مليت احكي و اغني
على حبك غصب عني
مليت ابقى حليمك و انتي في عيني شمروخ..
كفاية بقى يا مصر
يا شعبي المطاطي..
و دايما تحط واطي..
و لابس الذل مكسم ..
طواقي و بلاطي..
يا شعبي القديم ..
و قلبك سليم ..
بس المخ طاير..
من حشو اللئيم..
يا شعبي يا طيب
..نهارك قريب ..
بس لو تقراشوية..
و تعرف المسبب ..
يا شعبي يا درة ..
في قلب المجرة..
حرام عليك تكسر..
في الحر و الحرة ..
يا شعبي يا متباع ..
يا عايش بالدراع..
و باعوك اللصوص..
و انت راضي تنباع ..
يا شعبي يا شعبي
الكداب مصيره بيروح النار ،
بس في الدنيا دي بهوات ,,
يقتل في الحلم و ف الاحرار ,,
و يقول دا ما حدش ابدا مات،،
يزعل لما الفقير يتظاهر,,
و هو بيقبض مليونيات،،
و يقول اجيب للك منين يا كافر ,,
فلوسكوا بتتوزع عل العصابات
البسكلتة الانتاجية نادتني جيت انا بالعجل ..
الجادون طلع في ايدي اتاريه جر شكل..
العجلة كانت مفكوكة
و البلد كات مسروقة
و حاميها هو حراميها
و بايعها بالاجل !
رجعتلنا مصر حرة لتمنتاشر يوم ..
و سلمناها مقشرة لغراب الشوم..
خرج كل الحرامية و مسك في المظلوم..
و قال عاوزين ثورة طب اتلقوا المقسوم..
بشري للثوار والمتكلمون ،
كل واحد له حادثة او مكان في السجون..
و اللي قاعد بيسمع كدب التليفزيون..
اهي رجعتلك مصرك يا عبد يا مشؤوم..
ودعوتي و دعوة كل مقتول او مطحون..
الهي ياللي موافق اشوف في امك يوم
صباح مصر متكدر ~
و مليان بارود
متزفر ~بدم الشباب المتهدر ~ٍ
و صراخ الام..
صباح مصر متنيل~
بفقر العامل و العيل~
و خيبة فوق التخيل~
و شيلة الهم
مال الدنيا طعمها مر
زي الشاي و اتسمم السكر؟
مال الصباح اغبر و متعكر؟
مال الفرح وارم ومتكدر؟؟؟
دهس الغول الولاد؟
عملها فعلا و يقدر؟
يا عمري يا ممرر..
يا بكره يا احمر بلون الدم..
انده على الاحلام خليها كده تتلم..
الحلم بايخ
و الشعب دايخ
و كله جهل و هم..
لحد امتى يا مصر
مكتوب علينا الغم؟؟؟؟؟
انا المصري و المصرية
و جنسيتي نيلي..
انا قرآني بيتقرا
و بيتغنى انجيلي..
انا غصب عنك يا عسكري
صابر و قادر..
و يومي جاي حتعيط عليك مصر
و انا تغنيلي ...
يا بلدي
جلا جلا جلا ..
بصلي يا ولا ..
و ده برجل و منقلة ..
حنرسم سوا ثورة
و نمسحها بالهرتلة..
حنسلمها لشريك البلا..
و نتفرج على المهزلة..
و نقول العدو جلا..
و نقتل في المرجلة ..
و بعد كل ده
بولاد المستهبلة..
مصر ترجع مزبلة...
جلا جلا جلا ....
موت مينا و موت احمد..
كل قتيل في قلوبنا يخلد..
اقتل خالد اقتل مقلد..
بكره مظالمك دي تتبدد ..
حبنا يشهد قلبنا يجمد ..
لا عدنا نخاف و لا بنتهدد..
عملك اسود ..عملك اسود!!
دهستهم !
طرطش علي وشك دمهم؟
انت القاضي يا متهم!
موتهم؟
ساح تحت رجلك مخهم؟
سألتهم ايه حلمهم؟؟
و لا استعجلت تزفهم؟
صحيح، ازاي قتلتهم
جتلني يا اماي ابو بدلة ده..
انا فاكره اخوي حطيت يدي في يده ..
ادتله ظهري بأصلي ..
ضربني في خصري و جاللي ..
يا كافر يا خاين يا واطي ..
انا الاوامر دي جاتلي..
سبت روحي تطلع في يده ..
هو و كل اللي ساعده..
داعي عليهم يا امي..
يا رب ذله و هده ..
جولي آمين
و اهه كمان مات كمان ولد ..
كل يوم ضرب في حلم اتولد..
لا انت الخالق و لا انا عبد عندك ..
و لا يوم حأسلم و لا انوأد..
مدد مدد مدد مدد
شدي حيلك يا بلد
اللي ضربت القوارير عشان عربية و بتسوقها،
بوظت شريعة التحرير و قطعت في عروقها،
كذبت علي رب كبير وقعتك سوده،
و الله قادر روحك دي يحرقها