ساكني القصور و شيوخ البحور

يا قاعد فوق في قصرك متهني بالضيافة
و منافقينك تحاصرك بالكذب والسخافة
و كل الناس في مصرك مقتولة باللفافة
تصبح و شعبك عاصرك غريق من التفافة
يا واطي


البيه اللي عامل ريس مشغول قوي بالمايوه..
هم المصريين يا حيلتها بقوا البحر يروحوه؟؟
الغلب اكل ولادهم و مش لاقيين هدومهم،
بدل ما تفكر في القلع :هو فين ما يلبسوه!!!!!
هبل والله

مليت بقى يا مصر

يا مصر جيتي تقومي كسروكي و ملوكي شروخ ..
يا مصر ولادك غلابة يا مدهوس يا منفوخ..
يا مصر كل مدى الحب فيكي بيبوخ..
عاجبينك المسوخ ؟؟اللي باعوكي و الشيوخ؟؟..
الل بيرضى بالذل و بياكل البطروخ؟؟؟
و الراجل المطيع.. في تعذيبنا صاروخ.؟؟
و الظالم الشنيع.. و الحق اللي ملبوخ؟؟؟
و الكذب في كل وش و الحكم اللي مطبوخ؟؟؟
و اللي ميت بالجزمة واللي ميت مطخوخ؟؟؟
عاجبك يا مصر حالك؟؟؟؟ عشان انا خلاص مليت..
مليت العرر في قصورك و الشعب في التوابيت..
مليت احكي و اغني على حبك غصب عني..
مليت ابقىحبيتك و انتي في عيني شمروخ..
كفاية بقى يا مصر ..

يا شعبي

ا شعبي المطاطي..
و دايما تحط واطي..
و لابس الذل مكسم ..
طواقي و بلاطي..
يا شعبي القديم ..
و قلبك سليم ..
بس المخ طاير..
من حشو اللئيم..
يا شعبي يا طيب ..
نهارك قريب ..
بس لو تقراشوية..
و تعرف المسبب ..
يا شعبي يا درة ..
في قلب المجرة..
حرام عليك تكسر..
في الحر و الحرة ..
يا شعبي يا متباع ..
يا عايش بالدراع..
و باعوك اللصوص..
و انت راضي تنباع ..

يا شعبي يا شعبي

الكداب

الكداب مصيره بيروح النار ،
بس في الدنيا دي بهوات ,,
يقتل في الحلم و ف الاحرار ,,
و يقول دا ما حدش ابدا مات،،

يزعل لما الفقير يتظاهر,,
و هو بيقبض مليونيات،،
و يقول اجيب للك منين يا كافر ,,
فلوسكوا بتتوزع عل العصابات

ملخص الثورة

رجعتلنا مصر حرة لتمنتاشر يوم ..
و سلمناها مقشرة لغراب الشوم..
خرج كل الحرامية و مسك في المظلوم..
و قال عاوزين ثورة طب اتلقوا المقسوم..

بشري للثوار والمتكلمون ،
كل واحد له حادثة او مكان في السجون..
و اللي قاعد بيسمع كدب التليفزيون..
اهي رجعتلك مصرك يا عبد يا مشؤوم..
ودعوتي و دعوة كل مقتول او مطحون..
الهي ياللي موافق اشوف فيكم يوم

مينا و احمد

سند مينا راسه على الهلال ..
و صلب احمد عوده و قال..
انا و انت حكاية واحدة ..
و ترنيمة للرب في سجدة..
و ميت موال ..
و مصر عبادة بين الضلوع ..
تقدس الرسل محمد و يسوع ..
و اللي يفرق بين رسل الله ..
تحرم عليه كلمة خشوع ..
و بين الجموع ..
بانت البتول
تحن على الولد المقتول..
و نبي الرحمة ..
من وسط الزحمة ..
يلعن اللي يهد الصوامع..
و لو طالع من قلب جامع ..
و ينادي على المسلم و يقول ..
المعتدي دينه واقع
دينه واقع

اكتوبر 2011 - مينا و مصر

مال الدنيا طعمها مر زي الشاي و اتسمم السكر؟
مال الصباح اغبر و متعكر؟
مال الفرح وارم ومتكدر؟؟؟
دهس الغول الولاد؟ عملها فعلا و يقدر؟
يا عمري يا ممرر..
يا بكره يا احمر بلون الدم..
انده على الاحلام خليها كده تتلم..
الحلم بايخ و الشعب دايخ و كله جهل و هم..
لحد امتى يا مصر مكتوب علينا الغم؟؟؟؟؟


نا المصري و المصرية و جنسيتي نيلي..
انا قرآني بيتقرا و بيتغنى انجيلي..
انا غصب عنك يا عسكري صابر و قادر..
و يومي جاي حتعيط عليك مصر و انا تغنيلي
... يا بلدي


جلا جلا جلا ..
بصلي يا ولا ..
و ده برجل و منقلة ..
حنرسم سوا ثورة و نمسحها بالهرتلة..
حنسلمها مظطرة لشريك البلا..
و نتفرج على المهزلة..
و نقول العدو جلا..
و نقتل في المرجلة ..
و بعد كل ده بولاد المستهبلة..
مصر ترجع مزبلة...
جلا جلا جلا


موت مينا و موت احمد..
كل قتيل في قلوبنا يخلد..
اقتل خالد اقتل مقلد..
بكره مظالمك دي تتبدد ..
حبنا يشهد قلبنا يجمد ..
لا عدنا نخاف و لا بنتهدد..
عملك اسود ..عملك اسود!! ....


دهستهم !
طرطش علي وشك دمهم؟
انت القاضي يا متهم!
موتهم؟
ساح تحت رجلك مخهم؟
سألتهم ايه حلمهم؟؟
و لا استعجلت تزفهم؟
صحيح، ازاي قتلتهم



جتلني يا اماي ابو بدلة ده..
انا فاكره اخوي حطيت يدي في يده ..
ادتله ظهري بأصلي ..
ضربني في خصري و جاللي ..
يا كافر يا خاين يا واطي ..
انا الاوامر دي جاتلي..
سبت روحي تطلع في يده ..
هو و كل اللي ساعده..
داعي عليهم يا امي..
يا رب ذله و هده ..
جولي آمين


و اهه كمان مات كمان ولد ..
كل يوم ضرب في حلم اتولد..
لا انت الخالق و لا انا عبد عندك ..
و لا يوم حأسلم و لا انوأد..
مدد مدد مدد مدد شدي حيلك يا بلد

غش

ضحكتي النهاردة عاملة زي مطوة ف الوش..
الزرع دبل في الروح و القولة معلش..
سكتنا قالوا ليه السكات؟؟ اتكلم ..
ايه لازمة الكلام اللي كله غش ف غش؟؟؟
عجبي

النكسة الصح

النكسة مش يوم و علينا و عدى..
النكسة لما حكمنا كداب لئيم..
جاي من الطابونة بطبله..
يعين اصحابه الجهلة..
وزير صناعة و وزير تعليم..
خربها و سابها محتلة..
و سابها للاهبل منه..
عمل سلام من غير قوة..
رفع الحرامية و اللماليم..
طلق الدقون قتلوه ف عزه..
و سابها لعتل جاهل و زنيم..
تلاتين سنة قاعد يخرب فيها ..
ما سابش لا صحة ولا تعليم..
و كده ستين سنة انقفلوا..
خسرنا ارض و عرض و علم و سلم..
و اسمه حكم العسكر ده الفلم ..
افهم يا شعب ...كفاية تبليم..

بوسة

@Monasosh #tahrir #sep9
..أمانة يا رايح التحرير ابعت له من قلبي بوسة
و قوله كان بودي اجيك لكن السفر حوسة..
قوله يحررلي بلادي ..
و يرفع لي راس كل ولادي..
قوله يا خي
ده هو الامل
و هو الشرف
و شمس المحروسة

بيقولك عيد الفلاحين

يا ذالل الفلاح و حاطط عليه الطين
يا مزود الكيماوي و مرخص الفلاحين
يا مانع القمح و الرز
و مضيع القطن و العز
روح اتنيل على عينك
و اقبض على قلبك ملايين

كشوفات

يا سلفي كفاية تتظاهر عشان اختك كاميليا..
انما مصر دي مرات ابوك :سيبها تولع يا بلية..
بيعوا دينكم بالدنيا و اشتروا برلمان سكسونيا..
بكره الفاتورة جاية و التمن آخرة و دنيا


عملنا ثورة ما عملهاش شعب..
وضحينا بالروح و العين و القلب..
و النهاية عسكر و فقر و غلب..
الاعتصامات منعوها
و المسيرات حددوها
و العيال و حبسوها..
مستخسرين فينا كله
الا يا مصر الضرب!!

ثورة يناير حصلت في ثوراير
و لا حينفع معاها قمع و لا رتب و لا مجازر
و حتكسب و نكسب مهما مننا تحاذر
يا خدام اسيادك يا خاين يا كداب و باير

7\11\2011

و النبي لنكيد الظباط
ونزودلهم الإحباط
ونبااااهدلهم، ونهزأهم، ونفلفلهم و نحرقهم،
ياكايدينهم، ياذالينهم،
ياكابسينهم بالقوي يحنا

اكره الاهلي اه لكن تقتل اخويا لا ..
يا ابن الكلب يا خاين اسكتلك استحالة..
سكتنا قلنا نشوف ..
طلعتم خشى بلا خوف ..
يا عرة شرطة العالم ..
خلصنا كده قوالة



كل حاجةداخلية عيب و داخليتنا دي ام العيب
لا راضية تتلم و تتوب و لا راضية تنكشح و تسيب
يا داخلية يومك قرب جدا و لبلطجيتك في الضرب نصيب
مصر حتتحرر غصبا .. جربنا الذوق و ما نفعش طبيب

اضرب

اضربني ما تضرب
انا باضرابي راح اضرب
و يهرب اللي يضرب
و حاجيب منك حسابي،
يا واكل خيري غصب
و موكلني انا الضرب
امرح و العب يا خاين..
انا تاني ما حاقبل ضرب

الكلام لك يا جارة

اعطني حريتي اطلق يديا ..
انني اعطيت ما استبقيت شيا ..
خليك حلو و فك عني كلابك و اسوارك ..
بدل ما اكسرها و اكسرك وحياة عنيا


حازم بيبوس ايد صفوت حجازي..
زي ما غيره قبلها باس ايد صفوت..
بس دكها قال ايه الشريف..
كلها عصابات وعلينا بتتنطط..
و مافيش يا بويا واحد عزيز وعفيف..
بوس ايادي و تكفير او تخوين..
و ادي يا بلادالعسكر ..
آدي وش الضيف

قريش و تونس و الحرامي

يا جاي من قريش راكب الجهل حصان..
روح حرر فلسطين او ساعد باكستان..
خربتوا افغانستان و الصومال و السودان ..
لا حررتوا الارض و لا ساعدتوا انسان..
الله يخلصنا منكم يا حملة لوا السلطان..
ابعدوا عن مصر شوية ..
مصر حيحميها الرحمن......
!!


يا معفن و عرة و شحات البدل..
من ليبيا و كويت و سارق اللي انقتل..
يا بايع ف غازنا و مضيع بوغازنا.
. يا مفرح عدو مصر
بخيبتها و العلل........



يا مصر تونس قامت ....
و كلها كام يوم..
تسبقنا هي
و نلحقها
اصل إحنا خير التوم......
يا مصر قومي
خلصي الليلة ..
نحررك انتي..
و الدور بعدها ع الروم

1\9\2011 الصينية

يا واقف في الصينية..
و سايب الحدود..
يا بايع القضية ..
و عارر الجدود..
يا ضارب اللي حررها..
و مخون احلي بشرها..
يا خسارة و الف خسارة..
على افضل جنود



المجلس و الصينية قصة الشاطر حسن،
اللي ساب مصر مهانة ..
و سمع للوثن..
و قسي عل الشباب ..
و قسم الوطن..
و سايب الكلاب..
و ماسك اللي ..
انطحن



الداخلية بلطجية..
لكن المجلس شايفنا خاينين..
خدعه اللي بيوسوس ..
و ضرب بينا إسفين ..
جيشنا عبد المأمور..
و علينا بقي بيجور...
الاتنين غلط كبير..
و غلطوا فينا الاتنين....




غلطت..
و قلت..
ايد واحده...
يا مصر انا غلطان،
من امتي الإيد اللي بتضرب...
بتصلح اللي كان؟
يا مصر يا حبيبتي ..
والله محرجع اتهان...

يا مزبلة التاريخ.....
جاي شروة زعما....
اكلوا كل الطبيخ ....
و أدوا شعوبهم عضمة...
سكنوا هم القصور...
و ادونا بالجزمة....
يوسخو التوسيخ ...
انضف ما فيهم رمة...

المتشحين بالاسلام

يا شيخ الغبرة و الحاكم
يا بتاع منع المايوهات،
لكن الخرس ركبك
في كشف عرض البنات،
يا كداب وديني عندك سبوبة ،
الفتاوي جاهزة و ملعوبة
مش بس اتفوو واحدة
لا كتير اتفوهات

بيدعي عل الليبراليين
و يدعي عل العلمانيين..
و احنا موحدين يا ناس..
يبقي خرج هو من الدين..
بتسأل ليه يا مؤمن ؟
عشان بيكفر مسلمين!!!!

قال الحجة بيعتكف..
.. طب اختشي ولا انكسف..
بعت و كله انكشف ..
مصر ادتك الأمان..
سبت ابنها ف اللومان..
و بنتها تتعري و تتهان..
يخي جتكم القرف!!!


عاوز يهد التاريخ
الراجل بتاع البطيخ
لا تعرف علمه من فين
و معلم في فنون الصريخ،
ياخويا سيب خوفو ف حاله
و شوف دينك ..
كفاية تلبيخ

يابو عمة مايلة

يابو ضربة جوية عيرة
ذلتنا بيها يا بعيد:
شوف ولاد الكبيرة
بيطيروا بلا عواميد،
طلع جاب العلم
و رزعهم القلم
و شرف اهله و ناسه
مش خلاهم عبيد

نزل العلم

يا منزل علم الصهاينة
يا رافع راس بلادي،
يا مفرح ام الشهيد
و واخد تار ولادي،
ياطالع العمارة
و مبهدل السفارة،
يا مفرح حواري قلبي
وكابس الاعادي:

تسلم ياض

ياخي طظ في العلم
بس ما ناخذ بالقلم ..
مابقاش يا ناس في بلدي
و يسحلوني الرمم..
يا بلاد النيل و السخرة
امتى حيجي بكره
و نرتاح من الاهانة
و ننصف اللي اتظلم؟


زعلانة عل العلم
طب و اللي ابنه انظلم
و مات و لا اندفن
و اللي عشان الوطن
عينه راحت بلاش
و كمان بلا تمن..
كرامتنا تيجي الاول
قبل رفع العلم

حسرتين

نموت بايدين العدا
و بايدين حراسنا كمان..
بتفوت ببلاش و اهو كده ..
اغلى منا الحيوان..
حسرة على الل مات
و حسرة على من عاش..
المتهان في بلده يا ناس ..
في كل العالم متهان...
عجبي

الي الشاطر حسن و المحروسة

داخل على القناص
و بيرقص بالعلم..
شافوا بيصوب على عينه
لا خاف ولا حرن..
ساق الشجاعة بقلبه
و من عينه اتحرم..
آدي الراجل يا خي
مش كلب السلطة النتن..
عجبي


تقتل مصري ماشي
تشتم عسكري حاشا..
انت حق مالكاشي
اما العسكر باشا..
يا بلد أصحابها مداس
لامتي حتنضربوا يا ناس؟

يوم 17

تفافة الحر انضف من دم اللي خان
و سجن الحر انضف من قصور السجان
و عرافة السر قالتلي من زمان و زمان،
الوسخ وسخ و لو ابوه صبان ..
عجبي


خايف اوعدك ما اوفيش
اقولك دبلة تعملي فيش
اخطبلك برادعي
و الدخلة شاويش
خايف اموت
خايف اعيش

المحاكمة العسكرية جاية
وراك انت و هيه،
العسكرية للمدني الحر
و المدنية للحرامية..
مصر كده عدلها مقلوب
من ساعة ما مشوا الملكية..
وسية


المصري راح يتمشي
شبط فيه السكر
و الجهل لقي نفسه وحيد
شبط فيه العسكر
، ياااا ليل

يا ورد مصر

يزرع الورد الفرحة في بلاد التراب ..
ينزع البرد طرحة عروسة الشباب..
يجزع الخل و و في الزحمة يتحبس الاصحاب..
يمزع الحلم و الرحمة اللي دينه دبورة و كاب..
عامل جبار..

تنزل دمعة الورد تغرق المحروسة..
يقوم النخل و القمح يدوا وردهم بوسة..
تخطي العيدان الخضرا على الفوضى و الكوسة..
تحط في بق العيال نوجه و بسبوسة..
و تجامل الاخيار..

يا ورد لم غلطت قصوا ورقاتك..
عبيد الشوم و الغلط شردوا اخواتك..
بياعين العرض هتاكين الستر باعوا خلجاتك..
كسروا ظهر اولادك و كشفوا على سر بناتك..
والله كفار

يا طين ارض مصر يا مطفح الخاينين..
اقف يا طين في زورهم يموتوا منتنين..
يطلع من جتتهم خير يزرع الفدادين...
يعوض كل مظلوم لحد يوم الدين..
و تحلو الاخبار

يا ورد مين يشتريك و مصر بيك بتتغنى..
رغم الظلام و الظلم و الجبروت و اللعنة..
يعلى فيها الغفير و ينداس على البنا..
يتقدم فيها الهاموش و الورد يستني..
و اهو ده اللي صار

شط اسكندرية و نخيل الواحة و نيل سوهاج..
اشتروك يا ورد رغم السجن و الابراج..
لو ينشفوا قطرة نيجي بدالها امواج..
لو يقطعوا هدمة نغزل بميت حلاج..
احنا الازهار

يا مصر الورد ا شتراكي....
حتبيعيهم لمين يا امه يا بايعة الدار؟؟؟

اخص

يا سلفي و يا اخوان ..
يا متأخر على الميدان..
صمتم و فطركم شبابنا..
بعتوهم لكلب جبان..
بكره تصوموا بلا اجرة،
و لا حنحن و لا بنظرة..
اخص على اهل العبرة ،
لما يبيعوا بالمجان..
اخص

في غلب مصر 1

#egypt اشتريت لك خلخال يا بهية
بس انتي ترضي بيه..
الخلخال لونه اخضر
و معاه الحرية هدية..
ما تصدنيش يا حبي
و ما تغدريش بقلبي..
دانا مت في حبك فطيس
و اكلوا على الدية..
يا مصر

جرجا و العطارين
و العباسية و راس التين..
مصر بتتاوب
و بتصحى يا مؤمنين..
ادعي لامك يا واد
و اجري اهرب يا فساد..
ليلتكم انشالله
مطينة بطين

الاسم اسواني
و الفعل كتابة الحق..
و الاسم طنطاوي
و الفعل من غير حق..
والاسم مبارك
فساد و جبلة و حرام..
و الاسم برادعي

عمره ما داق الحرام..
اختارلي يا معلم

العواف.
من غير عفوا،
رصيدكوا حاف
و مش حاخاف،
لا انا ائتلاف
عليه تلوف
انا الألوف
و انا اللي شاف
، الحق جي
و شعبي حي.
انت خاف

اوعي تبيع
دمك للعسكر
و تتخم
، يا شعب
قوله يالبعيد
اختشي واتلم،
الحرية هي طلبي...
افهم
يا بجم

قال العسكر
صبح بزبيبة و كاب،
قال بيقولوا
حريتكم ارهاب،
و الاكاده يا خويا هم اللي
يقتلوا الشباب
، شفت الهباب؟
ملعون الكذب
في كل كتاب،
يا كداب


يا بو درع شفاف
و سلاح،
دم المصري
في ايدك ساح،
أخص علي
الاخ السفاح،
و أخص عل الشرف
اللي راح..
و الاقتراح:
موت ارتاح

العسكري دينه
هو نعم يا سيدي،
يا أنا عبد الكبير
يا كل الناس عبيدي،
اهله تحت البياده،
الذل عنده عباده
و كل يوم يمر
المر زي العادة

الاعلام الاعلام جيخلي عيشتكوا ضلام، حيحكم فيكوا الأقزام و يقزم كل العظام

كله داير 1 رمضان 1 اغسطس

كله داير ..
و شعب جاهل..
عليه ستاير ..
من الجهل شايل..
زكايب و جاير..
على اللي يحبه ..
و في قلبه شايل..
يخي يخرب بيت كل البهايم ..
و كل هايم..
في ملكوت غنايم .
و كل من ساهم..
في موت الحراير ..
يا مصر ساير ..
و في قلبي عايم..
همك و لازم ..
في يوم تصحي المداين ..
و تقتل الخاين..
عبد السلطان صاحب الصولجان..
و رغم الزمان ..
حنفرح يا ثاير ..
بحق اللي قادر
..يغير الكاين
و يتغير الكاين..

يا شرطي

يا شرطي يا قاتل في ولدي قتيل ،
مش حتفلت يا خويا
و لووضاع الدليل..
التمن حناخده كاش
و حياتك راحت بلاش
والشهيد مايتنساش!
رغم الليل الطويل

29\6\2011

يا عمر يا طاهر
الجرح مش ظاهر
و العسكر بيتاجر
و المنصر بيجاهر
و خلاص حنتاخر
و حنرجع من الاخر
نصرخ و نعافر
و تضربنا الحوافر.
اخص

28 يونيه

يا طاهر يا طاهرة يا بتوع الميدان
يا قاهر يا قاهرة العدا و الديدان .
يا رافعين رايتنا و مشرفين سيرتنا
يا امرا و شعرا
و نور الزمان


من 28 ل28

فاكرينا نايمين يا خدام السلاطين؟
رجعنا و دموعنا
على الشهيد تشجعنا
و ليلتكم كوبيه
و مطينة بطين..
راجعين

عدنا حيث كنا

و عدنا حيث كنا و عادوا حيث كانوا ..
ما كسبناش حرية و كسبونا اللي خانوا..
و رجعت مصر اسيرة و ظهر اصلهم وبانوا..
يا شعب فاقد عيونه و تاريخه و كيانه.. ..
يا شعب سايقك جهلتك و اللي ماتوا عشانك هانوا..
الجهل عاركم و ناركم
نساكم عقلكم و تاركم
و بكره شايل عكركم ..
و العقل فين منكم بيبانه؟؟؟
عجبي

انا حلو اهه

بص المصري لاخوه لقاه مراية لعظمته..
الجمال بينهم يتوه من عظمة حبهم و قيمته..
اه
المصرية واقفة تشيل و المصري راجل اصيل..
في الثورة دي يا ناس الشعب رجعت كرامته

رشا عزب و التحرش و سوريا

اوعي تكلمني يا مجلس ، شعبي جاي ورايا،،
حيعملك جرسه و حيقف معايا،،
انا رشا مش حسحس و لا سرقتش قرشايه،
روح اتشطر علي ابو نهبايه



تحرش يتحرش فهو حشرة دون وواطي ،
يخلي اي شريف من خجله منه يطاطي ،
بجزمتك و فوق دماغه
لحد ما تجيبي داغه،
الشعب يريد يدهسهم
بشكل ديموقراطي




#Egypt#SYRIA يا سوريا قومي و شدي الحيل .. ولدك حياخدك و حيكسب، و رغم الحمل اللي والله تقيل ولدك حالف ما يوم يهرب.. النصر جه النصر قرب

يا شرطة

يا شرطة يا ورطة يا ضربة و بلطة يا حارقة وحارتة..
يا حارقة قلوبنا و حارتة جيوبنا و جايبالنا جلطة..
يا شرطة اتمسي و علينا ما تقسي و بينا شوية حسي..
الناس سكتت كتير السكوت ماجابش خير و تاني مش ساكتة..
يا شرطة

خالد سعيد (مكتوبة في 10 يونية 2010)

خدي يا مصر حياتي ،بس سيبي وشي سليم..

خللي امي و اختي و خالي يشوفوني في كفني وسيم...

. ضحي بي لديابتك و حيتانك و المخبرين...

بس افضل حتة واحدة .. حتة مش حتتين...

خدي يا مصر كرامتي و ضحكي و دمي الرخيص

... بس سيبي راسي سليمة و حياة سيدنا البوليس...

ما تكسريش عضامي و تخلعي سناني ..

و ترميني في الشارع...

هل ده طلب عويص؟؟؟؟

الصاحب امان

الصاحب المصاحب اللي يقدم المراحب ..
و يفرح لما يعجب و يطاطي لو مش عاجب ..
و يحبك وانت بتضحك و مع رفع الحواجب..
و يحضن و انت مقرب و يعذر لو مش مقارب..
الصاحب جوه قلبك كأنه لنفسك قالب..
الصاحب يخليك تغلب ،حتى و هو غالب..
يا بخت من له صاحب

مصر غلبانة

يا رب مصر غلبانة ،
و ولادها شقى و شقيانة ،
و عل المرة و المرة معانا ،
و جوه و بره متهانة ،
و لا شكوى و لا قالوا اه يانا،
يا رب دمر من عدانا ،
و بهدلنا سرقة وخيانة ،
و عذب عيالنا و نسانا ،
و ذلنا و باعنا و لا شرانا..

يا رب دي مصر غلبانة

العواف

العواف.
من غير عفوا،
رصيدكوا حاف
و مش حاخاف،
لا انا ائتلاف
عليه تلوف
انا الألوف
و انا اللي شاف ،
الحق جي
و شعبي حي.

انت خاف

تغريدات عصفورات

حلنجي برنجي اخوانجي هلاس..
شعب اونطجي و في العادي بلاص..
يصبح في ثانية يهد الاساس..
و يبني هرم و يفني الحراس..
هو ده شعبي.. عظيم و محتاس



هو مين جاب السادات ؟
مش ناصر و لا امي؟؟
يا شعب فرحان بالمجانية
و بعد 60 سنة امي..
يا شعب غاوي تستعبط
على ابوك و على امي،
حرام عليك امي ؟؟


عملت اراجوز
عشان اضحك اولادي..
اتاريني انا كده
اراجوز و انا عادي..
يا ترى مصر اللي
عملت فيا كده؟؟
و لا انا كده من الاول
انا و اجدادي؟؟؟؟



يا بلاد الدجى..
يا عديمة الرجا ..
ياللي الثورة فيك ..
بيخطفوها العدا..
تخلصي من فرعون ..
تقعي في ايد ابوجهل ..
و سوا ده او ده..
غالب عليك الرضا....


ايه الفرق
بين موسي و فرعون؟
عمرو و مبارك
نفس القالب و التون..
جلافة و صلافة
و كدب و تحجر..
كأنهم نفس الطوبة
و اختلف بس اللون

خالد مات..
من اسفكسيا الاختناق ..
بس انت يا سباعي حتموت..
باسفوخصيا من البصاق..
عليا النعمة يا واطي..
و على الرجالة الطلاق..
انت راجل حقيق واطي..
و اللي عينك بلا اخلاق..


الشيخ صبح الصبح
لقى الفتوى مش عاجباه
راح قايم على طول لاغيها
و غير في ثانية فتواه
ما هو اصله دين ابوه
و دين اللي ولاه
اكيييد معاه تفويض..
و اكيد الصك معاه!!!

في تونس و البلاد العربية..
الرك على مصر الحرية..
لو مصر ما فكتش حبالها..
يبقى مالهمش دية..
ثورات و دوشة و قضية..
و المهم و اول بلية..
الانسان الحر الكعبة..
و كل حاجة تانية مقضية..

فن التهويش

فن التهويش
تبقى حرامي
تصبح مافيش
كله في الريش
و الريس في شرم
و مشيش الشيش
بقولك مافيش

يقبضوا عليك
يسيبوك تعيش
تجيب الموبايل
يحيي الشاويش
بقولك مافيش

و لا حتى قفا
و لا ريحة مقرفة
قاعد في طرة
بمخدة و ريش
بقولك مافيش

بنخم الغلابة
داحنا معاكم ديابة
و بنحكم دي الغابة
براحة و بشويش

شباب الحرافيش
حرية يا جيش
حرية ايه هي سايبة
انا بقولك مافيش

انسى ريحة الحرية
و تتكلم بحسن نية
لو مانتش من الحرامية
اعفقه يا شاويش

مش بقولك
مافيش
مافيش

طظ في

طظ في عدلكم ..
و البجاحة في دمكم..
و التناحة عند الحق..
و الجزمة لولدكم..
يا عالم حرام عليكم..
الثورة ماتت في ايديكم..
سمتونا بلطجية..
و دمنا ملون عينيكم..
و حاكررها تاني ليكم..
طظ
و طظ
فيكم

حبس الحرامية

يا نيل الحرامية يا منابع العفن.
يا اهرام من الدناوة و القسوة و العطن
يا معابد الرشاوي و القتل والفتن..
ميعادكم جالكم و شالكم
من على وش الوطن!!!!!

مصر كمان

مصر اللي ماتوا سالي و كريم ...
مصر نوارة و بلال و ابراهيم...
مصر البرادعي و نجيب العظيم ...
مصر الحياة مش حياة الموات


مصر المسلم و هو المسيحي ..
و الجريح فيهم جريحي ..
تربتهم جنبي فريحي ..
و دمهم واحد شربات ..

مصر جيشها اهه في الشوارع ..
يحمي اللي رايح و يشيل اللي راجع..
يستحمل عشانا المواجع ..
و مافيش شكاوى لا اهات

..

مصر امي في ساعة الفجرية ..
و امك و و صحن الملوخية ..
و امه و ريحة التقلية ..
مصر الحلوة ام الحلوات ..


مصر ابوك الشقيان ده طول عمره..
و اللي عاش عشان تخلف اوامره ..
و اللي اداك كل امله وعمره ..
و لسه بيدي و لا يقولش هات..

الشراع

يا مصر ...
شراع السواد سايق مراكب الهم ...
و واخدني ...
بشويش و النبي عليا.
.. اللي باع الولاد و حارق العباد ..
سقاني منقوع السم
و ليش ما تحسي بيا.؟.
مش انا الصداع في راسك ..
دانا الموجوع و ماسك ..
في ايديكي ..
و انتي بتقطعي ايديا ..
يا مصر تبيعيني ليه
و انا شاريكي ..
و تعميني ليه
و انا نور عينيكي ..
و تطعنيني ليه
و انا حاميكي...
رغم ا للي بيا؟؟؟
عجبي....

7-1-2011

لما اتولد سيدنا المسيح و جاب معاه الرحمة ريح..
طارت بيها كل الخطايا و اتعافي بيها اللي كان جريح..
و بإذن ربه و عشان بيحبه..حب سيدنا كل البشر..
و قال اللي ما بيرحم و الغل في قلبه.. ما حيرحمه رب البشر..
جه الشيطان غوى الانسان بإقتل اخوك ...............و دينك أمر..
... اللي دينه القتل في قلبه شوك ..و لا يعرف الله و لا هو بشر...
عجبي

جليطة

مجبورين نفتح عينينا..
نلاقي الموت غطا ..

و محسورين من اللي علينا
و على قلب الدار سطا..

و عاملين ما نعرفش ابدا
مين سبب اللخبطة ..

الكدب باسم الله
و السكوت على الجناة
و الجهل بمعني الحياة ..
بمنتهي الجليطة ..

و بندفع التمن ..
بالدم و الكفن ..
بس اللي منا اندفن ..
تاره في ايد الله ..
مش في ايدنا المحبطة..

عجبي .. !!